Kohli-Ishant: కోహ్లీ ఆకలి బాధల గురించి తెలుసా? ఇషాంత్ ఎమోషనల్ కామెంట్స్!
ABN , Publish Date - May 18 , 2025 | 03:15 PM
టాప్ బ్యాటర్ కోహ్లీ చిన్నతనంలో పడిన కష్టాల గురించి చెబుతూ ఎమోషనల్ అయిపోయాడు పేస్ బౌలర్ ఇషాంత్ శర్మ. రూపాయి రూపాయి దాస్తూ విరాట్ పడిన బాధలను అతడు పంచుకున్నాడు. మరి.. ఇషాంత్ ఇంకా ఏమేం చెప్పాడో ఇప్పుడు తెలుసుకుందాం..
విరాట్ కోహ్లీ.. ఈ పేరు చెబితే క్రికెట్ ప్రపంచం ఊగిపోతుంది. దశాబ్దంన్నర నుంచి వరల్డ్ క్రికెట్‌ను శాసిస్తూ వస్తున్నాడీ ఢిల్లీ కెరటం. హస్తినలో గల్లీ క్రికెట్ ఆడుతూ ఎదిగిన విరాట్.. ఆ తర్వాత కాలంలో ఏకంగా ప్రపంచ క్రికెట్‌కు బ్రాండ్ అంబాసిడర్‌గా మారాడు. సెంచరీల మీద సెంచరీలు బాదుతూ, రికార్డుల మీద రికార్డులు నమోదు చేస్తూ ఎవరికీ అందని స్థాయికి చేరుకున్నాడు. టీమిండియాతో పాటు ఐపీఎల్‌లో ఆర్సీబీకి ఆడుతూ, అలాగే అడ్వర్టయిజ్‌మెంట్స్‌లో నటిస్తూ, హోటల్-క్లోతింగ్ బిజినెస్ నడుపుతూ కోట్లాది రూపాయలు వెనకేసుకున్నాడు. అతడు తలచుకున్న వస్తువు క్షణాల్లో కళ్ల ముందు వాలాల్సిందే. అయితే ఈ రేంజ్‌లో ఉన్న కోహ్లీ.. ఒకప్పుడు ఆకలి కష్టాలు చూశాడట. తిండి కోసం రూపాయి రూపాయి దాచుకున్నాడట. ఈ విషయాన్ని భారత సీనియర్ పేసర్ ఇషాంత్ శర్మ బయటపెట్టాడు. ఇంతకీ లంబూ ఏమన్నాడంటే..
మన లాంటోడే: ఇషాంత్
విరాట్ కోహ్లీ అందరికీ స్టార్. కానీ నాకు మాత్రం చీకూ (కోహ్లీ ముద్దుపేరు)నే. బయటివాళ్లకు అతడో స్టార్. కానీ నేను అలా చూడను. ఎందుకంటే అండర్-17 నుంచి అతడితో కలసి ఆడుతున్నా. అతడు నా చిన్నప్పటి స్నేహితుడు. అండర్-19 ఆడుతున్నప్పుడు మా దగ్గర ఎన్ని డబ్బులు ఉన్నాయా అని పదే పదే లెక్కబెట్టేవాళ్లం. ఎంత మనీ ఉందో దాన్ని బట్టే తినేవాళ్లం. అండర్-19 మ్యాచులు ఆడటం ద్వారా వచ్చిన టీఏ డబ్బుల్ని దాచుకునేవాళ్లం. అందరికీ తెలిసిన కోహ్లీ వేరు, నాకు తెలిసిన నా మిత్రుడు విరాట్ వేరు. అతడు నాకు సోదరుడి లాంటోడు. ఈ స్థాయికి చేరుకోవడం నిజంగా గొప్ప విషయం. అందరూ అతడ్ని గొప్పోడిలా చూస్తున్నారు. కానీ వాస్తవానికి కోహ్లీ కూడా మన లాంటి మామూలు మనిషే. ఈ రేంజ్‌‌కు చేరుకునేందుకు విరాట్ ఎంతగా శ్రమించాడో అర్థం చేసుకోవాలి.. అని ఇషాంత్ చెప్పుకొచ్చాడు.
ఇవీ చదవండి:
భారతరత్న.. కోహ్లీ-రోహిత్ ఫ్యాన్స్ రచ్చ
మరిన్ని క్రీడా, తెలుగు వార్తల కోసం క్లిక్ చేయండి
