Kidney Health: కళ్లలో కనిపించే ఈ 5 లక్షణాలు.. కిడ్నీ సమస్యలకు హెచ్చరిక!

Eye Symptoms of Kidney Problems: ఆరోగ్యం బాగాలేనప్పుడు మనం ఆస్పత్రికి వెళ్లగానే ముందుగా డాక్టర్ పరిశీలించేది కళ్లనే. జలుబు, జ్వరం వంటి చిన్న సమస్యలు మొదలుకుని పెద్ద సమస్యల వరకూ డాక్టర్లు మొదట చెక్ చేసేది నేత్రాలనే. ఎందుకంటే, కళ్లు ఈ ప్రపంచాన్ని చూసేందుకు మాత్రమే కాదు. శరీరంలో ప్రతి అవయవం పనితీరునూ ప్రతిబింబిస్తాయి. కంటి ఆరోగ్యం సరిగా ఉంటే చాలు. వాళ్లు ఆరోగ్యవంతుల కిందే లెక్క. అలాగే, మీ శరీరంలో అంతర్లీనంగా మూత్రపిండాలు దెబ్బతింటుంటే కళ్లలో కనిపించే ఈ 5 లక్షణాల ఆధారంగా వ్యాధులు రాకుండా అడ్డుకోవచ్చు.

కళ్ళు మూత్రపిండాలతో సహా శరీరంలోని అనేక సమస్యల ప్రారంభ సంకేతాలను వెల్లడిస్తాయి. అయితే, కళ్లలో లేదా కళ్ల చుట్టూ కనిపించే ఈ లక్షణాలను చాలామంది నిర్లక్ష్యం చేస్తారు. ఈ చిన్న పొరపాటు తీవ్రమైన కిడ్నీ సమస్యలకు దారీతీసే ఛాన్స్ ఉంది. ముఖ్యంగా మధుమేహం లేదా అధిక రక్తపోటు వంటి దీర్ఘకాలిక వ్యాధులు ఉన్నవారు మరింత జాగ్రత్తగా ఉండాలి. మూత్రపిండాల సమస్యకు సంకేతాలుగా భావించే ఆ కంటి సంబంధిత లక్షణాలేవో ఇప్పుడు తెలుసుకుందాం.

ఉబ్బిన కళ్ళు

ఉదయం నిద్ర మేల్కొన్న తర్వాత తరచూ కళ్ళ చుట్టూ ఉబ్బినట్లు కనిపిస్తోందా? అయితే జాగ్రత్త. కిడ్నీలు సరిగా పనిచేయకపోవడం వల్లే ఇలా జరుగుతుంది. మూత్రంలో ప్రోటీన్ లీక్ అవుతుందనేందుకు ఇది ముందస్తు సంకేతం కావచ్చు. ప్రోటీన్యూరియా అని పిలువబడే ఈ సమస్య కిడ్నీ ఫిల్టర్లు (గ్లోమెరులి) దెబ్బతినడం వల్ల కనిపిస్తుంది. ఇది మూత్రపిండాల వ్యాధి ప్రారంభంలో కనిపించే సర్వసాధారణ లక్షణం. పాదాలలో వాపు లేదా అలసట వంటి ఇతర లక్షణాలు కనిపించక ముందే కళ్ళ చుట్టూ ఉబ్బుతుంటే వెంటనే వైద్యుణ్ణి సంప్రదించండి.

మసక దృష్టి

మూత్రపిండాల వ్యాధి పరోక్షంగా దృష్టి మసకబారడానికి కారణమవుతుంది. ముఖ్యంగా మధుమేహం లేదా అధిక రక్తపోటు ఉన్నవారిలో మూత్రపిండాల వైఫల్యానికి రెండు ప్రధాన కారణాలు ఉన్నాయి. హై బ్లడ్ షుగర్ రెటీనాలోని రక్త నాళాలను దెబ్బతీస్తుంది (డయాబెటిక్ రెటినోపతి). అంతేగాక అధిక రక్తపోటు ఉంటే హైపర్‌టెన్సివ్ రెటినోపతికి దారితీస్తుంది. చికిత్స చేయకపోతే కొన్నిసార్లు పూర్తిగా దృష్టి కోల్పోవచ్చు లేదా కంటిచూపు తీవ్రంగా దెబ్బతినవచ్చు.

పొడిబారిన లేదా దురద కళ్ళు

దీర్ఘకాలిక మూత్రపిండ వ్యాధి (CKD) రక్తంలో వ్యర్థ ఉత్పత్తులు పేరుకుపోవడానికి దారితీస్తుంది. ఈ పరిస్థితిని యురేమియా అంటారు. ఈ తరహా సమస్య ఉంటే కన్నీటి ఉత్పత్తి తగ్గుతుంది. కండ్లకలక వాపుకు కారణమవుతుంది. దీని వలన కళ్ళు పొడిబారడం, దురద లేదా జిగటగా మారతాయి. తర్వాతి దశలలో కళ్లు తీవ్రంగా పొడిబారి కార్నియల్ దెబ్బతినే ప్రమాదం పెరుగుతుంది.

ఎరుపు లేదా రక్తపు కళ్ళు

యురేమియా కంటిలోని చిన్న రక్త నాళాలలో కూడా వాపును కలిగిస్తుంది. దీంతో అవి ఎర్రగా లేదా రక్తంతో నిండినట్లు కనిపిస్తాయి. ఇంకా, కొన్ని మూత్రపిండ వ్యాధులు ఆటో ఇమ్యూన్ వ్యాధులతో (లూపస్ లేదా వాస్కులైటిస్ వంటివి) ముడిపడి ఉంటాయి. ఇవి ఎరుపు, కంటి నొప్పి లేదా కళ్ళ చుట్టూ వాపును కూడా కలిగిస్తాయి.

దృష్టి నష్టం లేదా దృష్టిలో ఆకస్మిక మార్పులు

అకస్మాత్తుగా చూపు కోల్పోవడం లేదా దృష్టి మార్పును ఎప్పుడూ విస్మరించకూడదు. మూత్రపిండ వ్యాధి ఉన్నవారిలో రెటీనా సిర లేదా ధమని మూసుకుపోయే ప్రమాదం ఎక్కువ. అధిక రక్తపోటు లేదా డయాలసిస్ వల్ల కూడా ఈ సమస్యలు రావచ్చు. ఇలాంటి పరిస్థితుల్లో తక్షణ వైద్య సహాయం అవసరం. కిడ్నీలు వేగంగా దెబ్బతింటున్నాయని చెప్పేందుకు ఈ లక్షణం ఒక సూచిక.

(NOTE: ఇంటర్నెట్‌లో సేకరించిన సమాచారం ఆధారంగా ఈ వివరాలు మీకు అందించటం జరిగింది. ఇందులోని అంశాలు కేవలం అవగాహన కోసం మాత్రమే. తదుపరి జరిగే ఎలాంటి పరిణామాలకు ABN ఆంధ్రజ్యోతి బాధ్యత వహించదు.)

Also Read:

ఈ 5 అలవాట్లు పాటిస్తే.. వయస్సు పెరిగినా అందం తగ్గదు..

చర్మం, పాదాలపై కనిపించే ఈ లక్షణాలు విటమిన్ డి లోపానికి సంకేతమా..

For More Health News