Sadiq Raja Arrest: బాంబు పేలుళ్ల కేసు నిందితుడి అరెస్ట్.. 29 ఏళ్ల తర్వాత..!

బాంబు పేలుళ్ల కేసుతోపాటు పలు హత్య కేసుల్లో నిందితుడు సాదిక్ రాజాను పోలీసులు అరెస్ట్ చేశారు. 1996 కోయంబత్తూర్ బాంబు పేలుళ్ల కేసులో ప్రధాన నిందితుడు సాదిక్‌ను తమిళనాడు పోలీసులు గురువారం రాత్రి అదుపులోకి తీసుకున్నారు. యాంటీ టెర్రరిజం స్క్వాడ్, కోయంబత్తూర్ నగర పోలీసుల ప్రత్యేక బృందం కలిసి కర్ణాటక విజయపుర జిల్లాలో అతడ్ని పట్టుకున్నారు. ఆ తర్వాత కోర్టులో హాజరుపరిచారు. అనంతరం కోర్టు ఆదేశాల మేరకు జ్యుడీషియల్ రిమాండ్‌లో భాగంగా కోయంబత్తూర్ సెంట్రల్ జైలుకు తరలించారు. 29 సంవత్సరాలుగా పరారీలో ఉన్న సాదిక్ నేర చరిత్ర తెలిస్తే షాక్ అవ్వాల్సిందే.

బాంబుల సరఫరా..

సాదిక్‌కు టైలర్ రాజా, వలరంత రాజా, షాజహాన్ అబ్దుల్ మజీద్ మకందర్, షాజహాన్ షేక్ అనే మారుపేర్లు కూడా ఉన్నాయి. 1996 ఫిబ్రవరి 14న కోయంబత్తూర్‌లో బాంబు పేలుళ్లు జరిగాయి. ఈ ఘటనలో 58 మంది మృతిచెందగా.. దాదాపుగా 200మంది గాయపడ్డారు. ఈ బాంబు దాడుల్లో కీలకపాత్ర పోషించిన సాదిక్.. అప్పటి నుంచి పోలీసులకు దొరకకుండా తప్పించుకొని తిరుగుతున్నాడు. అల్-ఉమ్మా సంస్థకు అతడు నేరుగా బాంబులు సరఫరా చేశాడనే ఆరోపణలు ఉన్నాయి.

కూరగాయల వ్యాపారిగా..

కోయంబత్తూర్ బాంబు పేలుళ్ల కేసులో మొత్తం 181 మంది నిందితులు ఉండగా.. వారిలో 178వ నిందితుడిగా సాదిక్ రాజా ఉన్నాడు. కోయంబత్తూర్‌కు పేలుడు పదార్థాలను రవాణా చేయడమే గాక అల్-ఉమ్మా నిందితులకు అతడు ఆశ్రయం కల్పించినట్లు పోలీసుల విచారణలో తేలింది. ఈ ఘటన తర్వాత తమిళనాడు నుంచి బెంగళూరుకు, ఆ తర్వాత హుబ్బలికి మకాం మార్చిన సాదిక్.. గత 12 ఏళ్లుగా విజయపురలో ఉంటున్నట్లు సమాచారం. కూరగాయల వ్యాపారం చేస్తూ ఓ స్థానిక మహిళను పెళ్లి చేసుకుని అక్కడే సెటిల్ అయ్యాడని తెలుస్తోంది. కోయంబత్తూర్ పేలుళ్లతోపాటు మధురై, నాగోర్‌లో జరిగిన బాంబు పేలుళ్లలోనూ అతడి ప్రమేయం ఉందని నిర్ధారణ అయింది. సాదిక్‌పై భారతీయ శిక్షాస్మృతి సెక్షన్‌లు 120-బీ (క్రిమినల్), 302 (హత్య), 307 (హత్యాయత్నం), 465 (మోసం)తోపాటు సెక్షన్‌లు 468, 471, 212, 148, 149, 114, 353 కింద కేసు నమోదు చేశారు.

ఇవీ చదవండి:

దక్షిణాది వారు డ్యాన్స్‌ బార్లను నడుపుతారు

పరిగణనలోకి ఆధార్‌ కూడా..

పుదుచ్చేరి సీఎం విధుల బహిష్కరణ

మరిన్ని జాతీయ వార్తల కోసం క్లిక్ చేయండి