Navy Ship Video: బ్రిడ్జ్‌ను ఢీకొట్టిన నేవీ షిప్.. వీడియో చూస్తే మైండ్‌బ్లాంక్
ABN , Publish Date - May 18 , 2025 | 03:09 PM
నేవీకి చెందిన ఓ నౌక బ్రిడ్జ్‌ను ఢీకొట్టింది. కలకలం రేపిన ఈ ఘటన ఎక్కడ జరిగింది.. ఆ నౌకలోని వ్యక్తులు ఎలా ఉన్నారు.. ఈ ప్రమాదానికి కారణం ఏంటనేది ఇప్పుడు చూద్దాం..
అగ్రరాజ్యం అమెరికాలోని న్యూయార్క్ నగరంలో ఓ నేవీ షిప్ ప్రమాదం కలకలం రేపింది. మెక్సికోకు చెందిన కువౌటెమోక్ అనే నేవీ శిక్షణా నౌక.. బ్రూక్లిన్ బ్రిడ్జ్‌ను గట్టిగా ఢీకొట్టింది. ఈ ఘటనలో ఇద్దరు ప్రాణాలు కోల్పోగా.. 19 మంది గాయపడ్డారు. ప్రయాణ సమయంలో మెక్సికన్ నౌకకు ఏర్పాటు చేసిన మూడడుగుల తెర భాగం బ్రూక్లిన్ బ్రిడ్జ్‌ను ఢీకొట్టింది. దీంతో ఆ షిప్‌కు ఏర్పాటు చేసిన భారీ తెరతో పాటు బ్రిడ్జ్ కింది భాగం ధ్వంసమయ్యాయి. దీనికి సంబంధించిన ఫొటోలు, వీడియోలు సోషల్ మీడియాలో వైరల్ అవుతున్నాయి.
ఊహించని ప్రమాదం..
మెక్సికోకు చెందిన ఈ శిక్షణా నౌక దాదాపు 297 అడుగుల పొడవు, 40 అడుగుల వెడల్పుతో ఉంది. బ్రిడ్జ్‌ను ఢీకొట్టడంతో షిప్ ప్రయాణం ఆగిపోయింది. శిక్షణలో భాగంగా ప్రతి ఏడాది ప్రపంచంలోని పలు పోర్ట్‌లకు వెళ్తూ ఉంటుందీ నౌక. ఇదే క్రమంలో ఈ సంవత్సరం ఏప్రిల్ 6వ తేదీన మెక్సికోలోని అకపుల్కో పోర్ట్ నుంచి జర్నీ మొదలుపెట్టింది. కింగ్‌స్టన్, హవానా, కోసుమెల్, న్యూయార్క్, సేంట్ మాలో, అబెర్డీన్ లాంటి 15 దేశాల్లోని 22 పోర్ట్‌లను సందర్శించాలని ప్రణాళిక వేశారు నేవీ అధికారులు. 277 మంది సిబ్బందితో నౌక ప్రయాణం మొదలైంది. కానీ న్యూయార్క్‌లో ఊహించని ప్రమాదంతో జర్నీ ఆగిపోయింది. ఈ ఘటన మీద మెక్సికో ప్రెసిడెంట్ క్లాడియా షైన్‌బామ్ స్పందించారు. నౌకలోని ఇద్దరు సిబ్బంది మృతి చెందడం బాధాకరమని అన్నారు. ఇది తమను తీవ్రంగా కలచివేసిందన్నారు షైన్‌బామ్.
ఇవీ చదవండి:
ఆపరేషన్ సిందూర్.. మరో వీడియో రిలీజ్
నీట్‌ ఫలితాల విడుదలపై మద్రాస్‌ హైకోర్టు స్టే
మరిన్ని జాతీయ, అంతర్జాతీయ వార్తల కోసం క్లిక్ చేయండి
