యువగళం పాదయాత్రపై పుస్తకం.. సహచర మంత్రులకు అందజేసిన మంత్రి లోకేశ్

రాష్ట్ర రాజకీయాలను మలుపు తిప్పిన యువగళం పాదయాత్రపై రూపొందించిన పుస్తకాన్ని యువనేత నారా లోకేశ్.. డిప్యూటీ సీఎం పవన్ కళ్యాణ్‌కు అందజేశారు. క్యాబినెట్ సమావేశం సందర్భంగా రాష్ట్ర సచివాలయంలో పుస్తక ప్రతిని పవన్‌తో పాటు ఇతర మంత్రులకు సైతం మంత్రి నారా లోకేశ్ అందజేశారు. ఈ సందర్భంగా పవన్ కళ్యాణ్ మాట్లాడుతూ... నాటి రాక్షస పాలనపై ప్రజలను చైతన్యవంతం చేయడంలో యువగళం పాదయాత్ర సఫలీకృతమైందన్నారు. ఆనాటి అనుభవాలను కళ్ళకి కట్టినట్లుగా పుస్తక రూపంలో తేవడంపై లోకేశ్‌ను ఈ సందర్భంగా ప్రశంసించారు. ఈ రోజుకి అరాచక పాలన అంతమై ఏడాది పూర్తయిందని.. గత ప్రభుత్వ పాలన పీడకలను ఇప్పటికి జనం మర్చిపోలేదని పవన్ కల్యాణ్ పేర్కొన్నారు. యువగళం పాదయాత్ర నాటి అనుభవాలను ఈ సందర్భంగా పవన్ కళ్యాణ్‌తో యువనేత లోకేశ్‌ పంచుకున్నారు.