Viral Video: ప్రధాని మోదీ, అమిత్ షా, జైశంకర్ దిష్టి బొమ్మల ఊరేగింపు
ABN , Publish Date - May 05 , 2025 | 01:46 PM
సోషల్ మీడియాలో ప్రతి రోజు కూడా అనేక వీడియోలు వైరల్ అవుతుంటాయి. ఈ క్రమంలోనే వైరల్ అయిన వీడియోలో భారత ప్రధాని మోదీ, కేంద్ర హోంమంత్రి అమిత్ షా, విదేశాంగ మంత్రి జైశంకర్‌ల దిష్టిబొమ్మలను జైలు లాంటి బోనులో పెట్టి, ప్రజాసమూహం ముందు ఊరేగించారు. ఆ విశేషాలేంటో ఇక్కడ చూద్దాం.
కెనడాలో ఖలిస్తానీ సానుభూతిపరులు నిర్వహించిన ఒక హిందూ వ్యతిరేక కవాతు వీడియో ప్రస్తుతం సోషల్ మీడియాలో వైరల్‌గా మారింది. ఈ కవాతులో భారత ప్రధానమంత్రి నరేంద్ర మోదీ, కేంద్ర హోంమంత్రి అమిత్ షా, విదేశాంగ మంత్రి ఎస్.జైశంకర్‌ల దిష్టిబొమ్మలను ఓ జైలు లాంటి బోనులో ఉంచి వాహనంపై ఊరేగింపు చేశారు. ఈ ఊరేగింపు టొరంటోలోని మాల్టన్ గురుద్వారా వద్ద ఆదివారం జరిగింది. ఈ కవాతులో దాదాపు 8,00,000 మంది హిందువులను భారతదేశానికి బహిష్కరించాలని ఖలిస్తానీ మద్దతు దారులు డిమాండ్ చేశారు. ఈ సంఘటన సోషల్ మీడియాలో చర్చనీయాంశంగా మారింది. దీనిని చూసిన హిందూ సంఘ నాయకులు, కెనడియన్ జర్నలిస్టులు తీవ్రంగా స్పందించారు.
కవాతు వివరాలు
కెనడా టొరంటోలో జరిగిన ఈ కవాతులో ఖలిస్తానీ సానుభూతిపరులు హిందూ వ్యతిరేక నినాదాలు చేస్తూ కనిపించారు. ఈ చర్య హిందూ సమాజంలో తీవ్ర ఆగ్రహాన్ని రేకెత్తించింది. ఈ కవాతు సిక్కు గురు ద్వారాలు, హిందూ దేవాలయాలపై ఇటీవల జరిగిన విధ్వంస సంఘటనల నేపథ్యంలో నిర్వహించడం చర్చనీయాంశంగా మారింది. ఈ సంఘటనలు భారత్-కెనడా సంబంధాలపై మరింత ఒత్తిడిని కలిగిస్తున్నాయని చెప్పవచ్చు. గతంలో కూడా కెనడాలోని ఒక హిందూ దేవాలయంపై జరిగిన దాడిని ప్రధానమంత్రి నరేంద్ర మోదీ తీవ్రంగా ఖండించారు. కెనడా ప్రభుత్వం చట్టాలను సక్రమంగా అమలు చేయాలని కోరారు.
హిందూ సంఘ నాయకుల స్పందన
కెనడాలో ఒక హిందూ సంఘ నేత షాన్ బిండా, ఈ వీడియోను సోషల్ మీడియాలో పోస్ట్ చేసి, ఖలిస్తానీ ఉగ్రవాద సంస్థ హిందూ వ్యతిరేక ద్వేషాన్ని తీవ్రంగా ఖండించారు. షాన్ బిండా తన పోస్ట్‌లో "ఇది భారత ప్రభుత్వానికి వ్యతిరేకంగా చేపట్టిన నిరసన కాదు. ఇది కెనడాలో అత్యంత దారుణమైన దాడికి పాల్పడిన ఖలిస్తానీ ఉగ్రవాద సంస్థ నుంచి వచ్చిన స్పష్టమైన హిందూ వ్యతిరేక ద్వేషం" అని పేర్కొన్నారు.
ఖలిస్తానీ దాడి
షాన్ బిండా 1985లో ఎయిర్ ఇండియా కనిష్క విమానంపై జరిగిన బాంబు దాడిని ప్రస్తావించారు. దీనిలో 329 మంది మరణించారు. ఈ దాడిని కెనడా చరిత్రలో అత్యంత దారుణమైన ఉగ్రవాద ఘటనగా వర్ణించారు. ఈ విమానం మాంట్రియల్ నుంచి ముంబైకి వెళుతుండగా, ఖలిస్తానీ ఉగ్రవాదులు దాడి చేశారు. ఈ సంఘటన ఖలిస్తానీ ఉద్యమం హింసాత్మక స్వభావాన్ని బహిర్గతం చేసింది. ఈ నేపథ్యంలో ఇలాంటి సంఘటనలపై కెనడాలో కొత్తగా వచ్చిన ప్రభుత్వం ఎలాంటి చర్యలు తీసుకుంటుందనే విషయాలు తెలియాల్సి ఉంది.
ఇవి కూడా చదవండి:
Donald Trump: విదేశాల్లో నిర్మించిన చిత్రాలపై 100% సుంకం..ఆ జైలు తిరిగి ప్రారంభిస్తాం
Tom Bailey: మ్యాచ్ ఆడుతున్న క్రమంలో జేబులోంచి పడిన మొబైల్.. వీడియో వైరల్
Punjab Kings: ధర్మశాలలో పంజాబ్ కింగ్స్ సరికొత్త రికార్డ్..పట్టికలో కూడా..
Read More Business News and Latest Telugu News
