Instagram Relationship: ఇదేం పని అమ్మా?

• కన్నకొడుకుని బస్టాండ్‌లో వదిలేసి.. ఇన్‌స్టాగ్రామ్‌లో పరిచయమైన యువకుడితో వెళ్లిపోయిన తల్లి

• గంటల వ్యవధిలో ఇద్దరినీ పట్టుకున్న నల్లగొండ పోలీసులు

• తండ్రికి బాలుడి అప్పగింత

నల్లగొండ, జూలై 27 (ఆంధ్రజ్యోతి): ఇన్‌స్టాగ్రామ్‌లో పరిచయమైన యువకుడి కోసం ఓ మహిళ అమ్మప్రేమకు మచ్చ తెచ్చే పని చేసింది. 15 నెలల వయస్సు ఉన్న తన కుమారుడిని బస్టాండ్‌లో అనాథగా వదిలేసి ఆ యువకుడితో వెళ్లిపోయింది. నల్లగొండ ఆర్టీసీ బస్టాండ్‌లో శనివారం సాయంత్రం ఈ ఘటన జరగ్గా.. పోలీసుల అప్రమత్తతో ఆ చిన్నారి తండ్రి చెంతకు చేరాడు. నల్లగొండ టూటౌన్‌ పోలీసుల కథనం ప్రకారం.. హైదరాబాద్‌లోని బోడుప్పల్‌కు చెందిన ఓ మహిళకు భర్త, ఇద్దరు పిల్లలు ఉన్నారు. నల్లగొండలోని ఓ సెల్‌ఫోన్‌ దుకాణంలో పని చేసే యువకుడితో ఆమెకు ఇన్‌స్టాగ్రామ్‌లో పరిచయం ఏర్పడింది. తన 15 నెలల కుమారుడితో శనివారం సాయంత్రం హైదరాబాద్‌ నుంచి నల్లగొండ బస్టాండ్‌కు చేరిన ఆ మహిళ.. తన ఇన్‌స్టా స్నేహితుడికి ఫోన్‌ చేసింది.

కాసేపటి తర్వాత కొడుకుని బస్టాండ్‌లోనే వదిలేసిన ఆ మహిళ.. ఆ యువకుడితో కలిసి ద్విచక్రవాహనంపై వెళ్లిపోయింది. తల్లి కనిపించకపోవడంతో ‘అమ్మా, అమ్మా’ అని ఏడుస్తూ ఆ బాలుడు బస్టాండ్‌లో తిరుగుతుండగా గమనించిన స్థానికులు, ఆర్టీసీ సిబ్బంది.. పోలీసులకు సమాచారం ఇచ్చారు. ఘటనాస్థలికి చేరుకుని పరిసరాల్లోని సీసీ కెమెరాల ఫుటేజీలను పరిశీలించిన పోలీసులు.. బాలుడి తల్లి ఓ యువకుడితో ద్విచక్రవాహనంపై వెళ్లిపోవడాన్ని గుర్తించారు. ఆ ద్విచక్రవాహనం నెంబర్‌ ఆధారంగా వాహన యజమానికి ఫోన్‌ చేశారు. స్నేహితుడు తన వాహనాన్ని తీసుకెళ్లాడని ఆ యజమాని చెప్పడంతో అతని వద్ద మరిన్ని వివరాలు సేకరించారు. దీంతో బాలుడి తల్లిని, ఆ యువకుడిని శనివారం రాత్రి పోలీసులు అదుపులోకి తీసుకున్నారు. అనంతరం ఆ మహిళ భర్తకు సమాచారం ఇచ్చి ఆదివారం పోలీసుస్టేషన్‌కు రప్పించిన పోలీసులు బాలుడిని తండ్రికి అప్పగించారు. ఈ సందర్భంగా అందరికీ కౌన్సిలింగ్‌ ఇచ్చారు. విషయాన్ని పెద్ద మనుషుల సమక్షంలో పరిష్కరించుకుంటామని మహిళ కుటుంబసభ్యులు చేసిన వినతి మేరకు పోలీసులు ఈ ఘటనపై కేసు నమోదు చేయలేదు.

ఇవి కూడా చదవండి...

గాజాపై దాడులకు విరామం.. ఇజ్రాయెల్ కీలక నిర్ణయం

కంబోడియా, థాయ్‌లాండ్ తక్షణం చర్చలు చేపట్టేందుకు రెడీ.. డొనాల్డ్ ట్రంప్ కీలక ప్రకటన

మరిన్ని అంతర్జాతీయ, తెలుగు వార్తల కోసం క్లిక్ చేయండి