Traffic: ఊళ్ల నుంచి హైదరాబాద్‌ బాట
ABN , Publish Date - Jan 20 , 2025 | 04:58 AM
సంక్రాంతి సందర్భంగా ఏపీ వైపు వెళ్లిన వారు తిరిగి హైదరాబాద్‌ బాట పట్టారు. ఈ నేపథ్యంలో ఉమ్మడి నల్లగొండ జిల్లా పరిధిలోని 65వ నంబరు జాతీయ రహదారిపై ఆదివారం వాహనాల రద్దీ పెరిగింది.
65వ నంబరు జాతీయ రహదారిపై వాహనాల రద్దీ
ఆదివారం 45 వేల వాహనాలు హైదరాబాద్‌ వైపు
చౌటుప్పల్‌ టౌన్‌, చౌటుప్పల్‌ రూరల్‌, కోదాడరూరల్‌, జనవరి 19 (ఆంధ్రజ్యోతి): సంక్రాంతి సందర్భంగా ఏపీ వైపు వెళ్లిన వారు తిరిగి హైదరాబాద్‌ బాట పట్టారు. ఈ నేపథ్యంలో ఉమ్మడి నల్లగొండ జిల్లా పరిధిలోని 65వ నంబరు జాతీయ రహదారిపై ఆదివారం వాహనాల రద్దీ పెరిగింది. నల్లగొండ జిల్లా కొర్లపహాడ్‌, యాదాద్రి భువనగిరి జిల్లా పంతంగి టోల్‌ ప్లాజా మీదుగా ఆదివారం 45 వేల వాహనాలు హైదరాబాద్‌ వైపు వెళ్లాయి. పంతంగి టోల్‌గేట్‌ వద్ద 16 గేట్లకు గాను 12గేట్ల నుంచి హైదరాబాద్‌ వైపు, నాలుగు గేట్ల నుంచి విజయవాడ వైపు వాహనాలను అనుమతించారు.
కేతేపల్లి మండలం కొర్లపహాడ్‌ టోల్‌గేట్‌లో 12 గేట్లకు గాను హైదరాబాద్‌ వైపు ఆరు గేట్ల నుంచి వాహనాలను అనుమతించారు. చౌటుప్పల్‌ పట్టణంలోని జాతీయ రహదారిపై వాహనాల రద్దీ నేపథ్యంలో ట్రాఫిక్‌ అంతరాయం కలగకుండా 200మంది పోలీసు సిబ్బంది విధులు నిర్వర్తించారు.
