Viral Video: ఇరాన్‌పై ఇజ్రాయెల్ భారీ దాడులు.. మంటల్లో చిక్కుకున్న భవనాలు..
ABN , Publish Date - Jun 13 , 2025 | 06:22 PM
ఇజ్రాయెల్ మరోసారి భారీ వైమానిక దాడిని ప్రారంభించింది. ఇరాన్‌పై కొనసాగిన ఈ సర్జికల్ స్ట్రైక్స్‌లో దాదాపు 200 యుద్ధ విమానాలు మోహరించబడి, 100కి పైగా వ్యూహాత్మక లక్ష్యాలను కూల్చివేశాయి. దీంతో మధ్యప్రాచ్యంలో ఉద్రిక్తతలు మరింత తీవ్రరూపం దాల్చాయి. అందుకు సంబంధించిన వీడియోలు నెట్టింట వైరల్ అవుతున్నాయి.
ఇజ్రాయెల్ శుక్రవారం (జూన్ 13, 2025న) రైజింగ్ లయన్ పేరుతో ఇరాన్‌పై (Israel Attack on Iran) భారీ దాడులు నిర్వహించింది. ఈ దాడుల్లో దాదాపు 200 ఇజ్రాయెల్ యుద్ధ విమానాలు 100కి పైగా లక్ష్యాలపై విరుచుకుపడ్డాయి. వీటిలో నతాంజ్ అణు కేంద్రం, ఖోర్రమాబాద్, ఖొండాబ్, తాబ్రిజ్ వంటి కీలక సైనిక, అణు సదుపాయాల ప్రాంతాలు ఉన్నాయి. ఈ దాడిలో ఇరాన్ సైనిక అధికారి మేజర్ జనరల్ హుస్సేన్ సలామీ, మేజర్ జనరల్ మొహమ్మద్ బాగెరీ, ప్రముఖ అణు శాస్త్రవేత్తలు ఫెరేయ్డూన్ అబ్బాసీ, మొహమ్మద్ మెహ్దీ తేహ్రాంచి సహా పలువురు మరణించారు.
దాడి కారణాలు, లక్ష్యాలు
ఇజ్రాయెల్ ప్రధాని నెతన్యాహూ ప్రకారం ఈ దాడులు ఇరాన్ అణుశక్తిని అడ్డుకోవడానికి చేపట్టిన చర్యగా చెబుతున్నారు. ఇరాన్ 60 శాతం శుద్ధి చేసిన యురేనియం నిల్వలను కలిగి ఉంది. అంతేకాకుండా ఇరాన్ అణు ఒప్పందాలకు విరుద్ధంగా వ్యవహరించిందని ఐఏఈఏ (IAEA) ఇటీవల ప్రకటించడంతో, ఇజ్రాయెల్ ఈ దాడిని అత్యవసర చర్యగా భావించింది. ఇజ్రాయెల్ ప్రధాని నెతన్యాహూ ఈ దాడులు ఇరాన్ అణుశక్తిని అడ్డుకోవడానికి కొనసాగుతాయని ప్రకటించారు. ఇరాన్ ఈ దాడులను తీవ్రంగా ఖండిస్తూ, ప్రతిస్పందన చర్యలను చేపడతామని ప్రకటించింది. ఈ పరిణామాలు మిడిల్ ఈస్ట్‌లో మరింత ఉద్రిక్తతలకు దారితీస్తాయని అంతర్జాతీయ నిపుణులు భావిస్తున్నారు.
దాడి ప్రభావం
ఈ దాడి కారణంగా టెహ్రాన్ నగరంలో భారీ పేలుళ్లు సంభవించి మంటలు, పొగలు ఎగిసిపడ్డాయి. అందుకు సంబంధించిన వీడియోలు ప్రస్తుతం సోషల్ మీడియాలో వైరల్ అవుతున్నాయి. వీడియోలలో పెద్దపెద్ద భవనాలు కూలిపోయినట్లు కనిపిస్తున్నాయి. ఈ దాడుల్లో పౌరులు, మహిళలు, పిల్లలు సహా అనేక మంది ప్రాణాలు కోల్పోయారని ఇరాన్ ప్రభుత్వ మీడియా ప్రకటించింది.
ఇరాన్ ప్రతిస్పందన
ఈ దాడికి ప్రతిస్పందనగా ఇరాన్ దాదాపు 100 డ్రోన్లను ఇజ్రాయెల్ వైమానిక సరిహద్దులకు పంపింది. ఈ డ్రోన్లను తమ సరిహద్దులలోనే అడ్డుకున్నట్లు ఇజ్రాయెల్ వైమానిక దళం తెలిపింది. ఈ దాడులపై సౌదీ అరేబియా, టర్కీ, పాకిస్థాన్, బంగ్లాదేశ్, లిబియా, సిరియా సహా పలు దేశాలు అసంతృప్తి వ్యక్తం చేశాయి. అమెరికా అధ్యక్షుడు ట్రంప్ ఈ దాడిలో తమ భాగస్వామ్యం లేదని స్పష్టం చేశారు.
ఈ వార్తలు కూడా చదవండి..
మీ పర్సనల్ లోన్ ఇలా తీర్చుకోండి.. మీ ఖర్చులు తగ్గించుకోండి..
పన్ను చెల్లింపుదారులకు అలర్ట్.. జూన్ 15 లాస్ట్ డేట్, లేదంటే..
For National News And Telugu News
