వాషింగ్ మెషీన్ త్వరగా చెడిపోవడానికి కారణాలివే..

ఇంటర్నెట్ డెస్క్: ఈ రోజుల్లో వాషింగ్ మెషీన్ ప్రతి ఇంట్లో తప్పనిసరిగా మారింది. ఇందుకు ప్రధాన కారణం జీవనశైలి మార్పులు, సమయం కొరత. ఇప్పటి బిజీ జీవితంలో చేతితో బట్టలు ఉతకడానికి చాలా మందికి సమయం ఉండదు. వాషింగ్ మెషీన్ వల్ల తక్కువ సమయంలో ఎక్కువ బట్టలు సులభంగా శుభ్రం చేసుకోవచ్చు. అలాగే శ్రమ కూడా తగ్గుతుంది.

అయితే, కొన్ని పొరపాట్ల వల్ల వాషింగ్ మెషీన్ త్వరగా పాడవడమే కాకుండా, బట్టలు కూడా సరిగ్గా శుభ్రం కావు. మనలో చాలా మంది బట్టలను మెషీన్‌లో వేసి, డిటర్జెంట్ పోసి, బటన్ నొక్కేస్తాం. కానీ ఈ అలవాటు కొన్నిసార్లు సమస్యలకు కారణమవుతుంది. కాబట్టి, వాషింగ్ మెషీన్‌లో బట్టలు ఉతికేటప్పుడు చేయకూడని ఐదు ముఖ్యమైన తప్పులు ఏమిటో తెలుసుకుందాం..

ఎక్కువ బట్టలు వేయడం

ఒకేసారి ఎక్కువ బట్టలు వాషింగ్ మెషీన్‌లో వేయడం పెద్ద తప్పు. ఇలా చేయడం వల్ల మెషీన్ మోటార్‌పై అధిక ఒత్తిడి పడుతుంది, దాంతో అది త్వరగా పాడయ్యే ప్రమాదం ఉంటుంది. అలాగే బట్టలు కూడా సరిగ్గా శుభ్రం కావు. అందువల్ల మెషీన్ సామర్థ్యానికి మించి బట్టలు వేయకుండా జాగ్రత్తపడాలి.

సరైన సెట్టింగ్‌లు

బట్టల రకం, వస్త్ర నాణ్యతను బట్టి సరైన మోడ్‌ను ఎంచుకోవడం చాలా ముఖ్యం. సరైన సెట్టింగ్ ఉపయోగిస్తే బట్టలు బాగా శుభ్రం అవ్వడంతో పాటు వాటి మన్నిక కూడా పెరుగుతుంది. చాలా మంది మాన్యువల్ చదవకుండా ఒకే సెట్టింగ్‌ను ఉపయోగిస్తారు. కానీ ఇది బట్టలకు, మెషీన్‌కు హాని కలిగిస్తుంది. కాబట్టి సరైన మోడ్‌ను ఎంచుకోవడం అవసరం.

జేబులు చెక్ చేయకపోవడం

బట్టలను నేరుగా వాషింగ్ మెషీన్‌లో వేయడానికి ముందు జేబులను తప్పకుండా చెక్ చేయాలి. నాణేలు, తాళాలు, డబ్బు వంటి వస్తువులు లోపల ఉండి మెషీన్‌కు నష్టం కలిగించే అవకాశం ఉంది. ఇవి మెషీన్‌లో ఇరుక్కుపోయి దాని పనితీరును దెబ్బతీస్తాయి.

ఎక్కువ డిటర్జెంట్ వాడటం

బట్టలు ఎక్కువ మురికిగా ఉన్నాయని ఎక్కువ డిటర్జెంట్ వేసినా ప్రయోజనం ఉండదు. అది మెషీన్‌లో ఫోమ్ ఎక్కువగా తయారై, లోపల అడ్డంకులు కలిగించవచ్చు. కాబట్టి అవసరమైనంత మాత్రమె డిటర్జెంట్ వాడాలి.

మెషీన్ శుభ్రం చేయకపోవడం

వాషింగ్ మెషీన్‌ను క్రమం తప్పకుండా శుభ్రం చేయకపోతే, లోపల మురికి పేరుకుపోయి పనితీరు తగ్గిపోతుంది. కాబట్టి మెషీన్‌ను శుభ్రం చేయడం చాలా అవసరం. ఈ చిన్న చిన్న జాగ్రత్తలు పాటిస్తే మీ వాషింగ్ మెషీన్ ఎక్కువకాలం బాగానే పనిచేస్తుంది. అలాగే బట్టలు కూడా శుభ్రంగా, సురక్షితంగా ఉంటాయి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఆఫీసులో గంటల తరబడి కూర్చుంటున్నారా? మీ ఆరోగ్యం ప్రమాదంలో ఉన్నట్టే!

ప్రకృతి ప్రసాదించిన యాంటీ బయాటిక్స్.. రోగనిరోధక శక్తిని పెంచే 'సూపర్ మసాలాలు' ఇవే!

For More Latest News