Health Tips: డెంగుకు గురి కాకుండా...
ABN , Publish Date - Jul 08 , 2025 | 12:13 AM
వానలు ఊపందుకున్నాయి. వాటితో పాటే దోమలు కూడా. మరీ ముఖ్యంగా డెంగు దోమలు ఈ కాలంలో ఉధృతంగా పెరిగిపోతాయి.
వానలు ఊపందుకున్నాయి. వాటితో పాటే దోమలు కూడా. మరీ ముఖ్యంగా డెంగు దోమలు ఈ కాలంలో ఉధృతంగా పెరిగిపోతాయి. కాబట్టి వాటి బెడద లేకుండా తగిన జాగ్రత్తలు పాటించాలి. అవేంటంటే...
ఈడిస్‌ ఈజిప్టై అనే దోమ ప్రధానంగా డెంగూ వైరస్‌ను వ్యాప్తి చేస్తుంది. ఈ వైరల్‌ ఇన్‌ఫెక్షన్‌.. విపరీతమైన జ్వరం, భరించలేనంత తలనొప్పి, కీళ్లు, కండరాల నొప్పులతో వేధిస్తుంది. కాబట్టి ఈ వైరస్‌ వ్యాప్తికి తోడ్పడే దోమలు ఇంటి పరిసరాల్లో లేకుండా తగిన జాగ్రత్తలు తీసుకోవాలి. అందుకోసం....
పూల తొట్లు, వాటి సాసర్లు, పాత టైర్లు, బక్కెట్లు, నీళ్లు నిల్వ ఉండే వీలుండే పాత్రలన్నిటినీ ఖాళీ చేయాలి. అలాగే డ్రెయిన్లు, గట్టర్లలో అవరోధాలు ఏర్పడి, నీరు నిల్వ ఉండిపోకుండా చూసుకోవాలి.
పొడవు చేతుల చొక్కాలు, ప్యాంట్లు ధరిస్తూ, సాధ్యమైనంత మేరకు శరీరాన్ని కప్పి ఉంచే ప్రయత్నం చేయాలి.
దోమ తెరలు వాడుకోవాలి. కిటికీలు, తలుపులకు స్ర్కీన్స్‌ బిగించుకోవాలి.
మరీ ముఖ్యంగా దోమలు విజృంభించే సాయంకాలం వేళ తలుపులు, కిటికీలు మూసి ఉంచాలి.
ప్రతి కుటుంబం వారంలో ఒక రోజు పరిసరాల్లో నీళ్లు నిల్వ ఉండే వీలుండే కంటికి కనిపించని ప్రదేశాల కోసం గాలించే పనికి పూనుకోవాలి.
కూలర్ల ట్రేలు, రిఫ్రిజిరేటర్ల డ్రిప్‌ ప్యాన్లలో నీళ్లు లేకుండా చూసుకోవాలి. గార్డెన్‌, బాల్కనీల్లో వదిలేసిన ఖాళీ సీసాలు, డబ్బాలను తొలగించాలి.
