Sanjay Raut: మంత్రి ఇంట్లో నోట్ల కట్టలు!
ABN , Publish Date - Jul 12 , 2025 | 05:29 AM
శివసేన(యూబీటీ) ఎంపీ సంజయ్‌ రౌత్‌ ఎక్స్‌లో శుక్రవారం పోస్టు చేసిన ఓ వీడియో మహారాష్ట్రలో రాజకీయ దుమారం రేపింది.
కరెన్సీ నోట్లతో నిండి ఉన్న బ్యాగ్‌
మహారాష్ట్రలో ఘటన
సోషల్‌ మీడియాలో వైరల్‌
మంత్రి శివసేన (శిందే) నేత
ముంబై, జూలై 11: శివసేన(యూబీటీ) ఎంపీ సంజయ్‌ రౌత్‌ ఎక్స్‌లో శుక్రవారం పోస్టు చేసిన ఓ వీడియో మహారాష్ట్రలో రాజకీయ దుమారం రేపింది. మహారాష్ట్ర సామాజిక న్యాయ శాఖ మంత్రి, శిందే వర్గం శివసేన నేత సంజయ్‌ శిర్సాట్‌ ఇంట్లోని ఓ బ్యాగులో కరెన్సీ నోట్ల కట్టలు ఉండడం, ఆ బ్యాగుకు కాస్త దూరంలో శిర్సాట్‌ కూడా ఉండడమే ఇందుకు కారణం. సంజయ్‌ రౌత్‌ పోస్టు చేసిన వీడియోలో ఏముందంటే.. మంత్రి సంజయ్‌ శిర్సాట్‌ ఓ గదిలో మంచంపై కూర్చోని సిగిరెట్‌ కాలుస్తుండగా.. ఆ మంచానికి కాస్త దూరంలో నోట్ల కట్టలతో నిండి ఉన్న ఓ బ్యాగు తెరిచి ఉన్నట్టు కనిపిస్తోంది.
శిర్సాట్‌తోపాటు ఆయన పెంపుడు శునకం కూడా గదిలో ఉంది. ఈ వీడియోను ఎక్స్‌లో పోస్టు చేసిన సంజయ్‌ రౌత్‌.. ప్రధాని మోదీ, కేంద్ర మంత్రి అమిత్‌ షా ఈ వీడియో చూడాలని కోరారు. వీడియోపై సంజయ్‌ శిర్సాట్‌ కూడా స్పందించారు. ఆ వీడియోలో ఉన్నది తానేనని, తన ఇంటి పడక గదిలో కూర్చోని ఉన్నానని, పక్కన ఉంది తన పెంపుడు శునకమేనని తెలిపారు. అయితే, ఆ డబ్బుల సంగతి తనకు తెలియదన్నారు. నిజంగా తన దగ్గర అంత డబ్బు ఉంటే వాటిని దాచుకునేందుకు తన ఇంట్లో బీరువాలు ఉన్నాయని విమర్శలను తోసిపుచ్చారు. ఎవరో కావాలనే ఈ వీడియో తీసి తనపై కుట్ర చేస్తున్నారని ఆరోపించారు. కాగా, 2019-24 మధ్యలో ఆదాయానికి మించి ఆస్తులు కలిగి ఉన్నారంటూ సంజయ్‌ శిర్సాట్‌కు ఆదాయ పన్ను శాఖ గురువారమే నోటీసులు ఇవ్వడం గమనార్హం.
