Drunk Truck Driver Crashes: మద్యం మత్తులో బీభత్సం సృష్టించిన ట్రక్ డ్రైవర్.. 14 మంది మృతి..
ABN , Publish Date - Nov 03 , 2025 | 03:31 PM
దేశ వ్యాప్తంగా రెండు రోజుల వ్యవధిలో మూడు ఘోర రోడ్డు ప్రమాదాలు జరిగాయి. ఈ ప్రమాదాల్లో 50 మంది దాకా చనిపోయారు. రాజస్థాన్లో ఆదివారం ఓ ప్రమాదం, సోమవారం మరో ప్రమాదం చోటుచేసుకుంది.
రాజస్థాన్: వరుస రోడ్డు ప్రమాదాలతో దేశం ఉక్కిరిబిక్కిరి అవుతోంది. రెండు రోజుల వ్యవధిలో దేశ వ్యాప్తంగా మూడు ఘోర రోడ్డు ప్రమాదాలు చోటుచేసుకున్నాయి. నిన్న(ఆదివారం) రాజస్థాన్లోని ఫలోడి జిల్లాలో ఓ టెంపో కారు రోడ్డు పక్కన ఆగి ఉన్న వాహనాన్ని ఢీకొంది. ఈ ప్రమాదంలో 18 మంది చనిపోయారు. ఈరోజు ( సోమవారం) తెలంగాణ రంగారెడ్డి జిల్లాలో బస్సు ప్రమాదానికి గురైంది. దీంతో 19మంది మృతిచెందగా.. పదుల సంఖ్యలో తీవ్రంగా గాయపడ్డారు. ఈ రెండు సంఘటనల నుంచి తేరుకోక ముందే మరో ప్రమాదం సంచలనం సృష్టిస్తోంది.
మరో ఘోర ప్రమాదం..
రాజస్థాన్లోని జైపూర్లో ఓ ట్రక్ డ్రైవర్ తాగిన మత్తులో బీభత్సం సృష్టించాడు. ట్రక్కుతో ఆగి ఉన్న వాహనాలను ఢీకొట్టాడు. ఈ ప్రమాదంలో 14 మంది వరకూ ప్రాణాలు కోల్పోగా.. మరో 50 మంది తీవ్రంగా గాయపడ్డారు. సోమవారం మధ్యాహ్నం ఈ సంఘటన చోటుచేసుకుంది. ఇక, ఈ ఘటనకు సంబంధించిన దృశ్యాలు ప్రమాదం జరిగిన లోహమండి రోడ్లోని ఓ షాపులో రికార్డు అయ్యాయి. ఆ సీసీటీవీ ఫుటేజీ వీడియోలో భీకర దృశ్యాలు ఉన్నాయి. ఆ ట్రక్ అడ్డం వచ్చిన వాహనాన్ని వాయు వేగంతో ఢీకొట్టుకుంటూ వెళ్లి పలువురి ప్రాణాలు తీసింది.
బ్రేకులు వెయ్యని డ్రైవర్..
ప్రమాదం గురించి సమాచారం అందుకున్న పోలీసులు హుటాహుటిన సంఘటనా స్థలానికి చేరుకున్నారు. సహాయక చర్యలు చేపట్టారు. పోలీసుల ప్రాథమిక దర్యాప్తులో ఓ దారుణమైన విషయం బయటపడింది. ట్రక్ అదుపు తప్పిన తర్వాత ఆ డ్రైవర్ అర కిలోమీటర్ వరకు బ్రేకులు వెయ్యలేదు. అడ్డం వచ్చిన వాహనాలను ఢీకొట్టుకుంటూనే వెళ్లిపోయాడు. పోలీసులు డ్రైవర్ను అరెస్ట్ చేశారు. అతడ్ని విచారిస్తున్నారు. ఇక, ఈ సంఘటనపై ప్రధాని నరేంద్ర మోదీ దిగ్భ్రాంతి వ్యక్తం చేశారు. మృతుల కుటుంబాలకు 2 లక్షల రూపాయల ఎక్స్గ్రేషియా ప్రకటించారు. గాయపడ్డ వారికి 50 వేల రూపాయలు ఇవ్వనున్నట్లు తెలిపారు.
ఇవి కూడా చదవండి
ఎయిర్ ఇండియా ప్రమాదం.. నరకం చూస్తున్న విశ్వాస్ కుమార్..
ఫ్లెమింగో ఫెస్టివల్కు వేళాయె.. సైబీరియన్ పక్షుల రాకపై పవన్ ట్వీట్
