Ravi Mantri : రచయిత పరిశీలన కనపడే రచన నచ్చుతుంది

చదువు ముచ్చట

• ఆఖరుగా ఏ పుస్తకాన్ని చదివి బాగా ఇష్టపడ్డారు?

కేశవరెడ్డి నవల ‘మునెమ్మ’.

• ఏ తరహా పుస్తకాల్ని చదవటానికి ఇష్టపడతారు?

నిజ జీవితానికి దగ్గరగా ఉండేవి. ఇది నేను ఎక్కడో చూసాను అనిపించేవి.

• మొదటిసారి ఏ పుస్తకాన్ని ఇష్టంగా చదవటం గుర్తుంది?

చలం ‘మైదానం’. 17–18 సంవత్సరాల వయసులో చదివాను.

• మీ పుస్తకాభిరుచి కాలంతోపాటు ఎలా మారింది?

ఒక వర్గం కోసమో, ఎవరినో చదివించటానికో రాసే కథలు కాక, ఈ రచయిత చాలా పరిశీలన చేసి రాసాడు, జీవితం మీద పట్టు ఉంది అనిపించే కథలు నచ్చటం మొదలుపెట్టాయి.

• సాహిత్యంలో మీకు నచ్చిన కల్పిత పాత్ర?

బుచ్చిబాబు ‘చివరకు మిగిలేది’ నవలలో దయానిధి.

యండమూరి ‘అనైతికం’ నవలలో అహల్య.

• గత కాలం రచయితల్ని కలిసి మాట్లాడగలిగితే ఎవరితో మాట్లాడతారు?

చలం, గొల్లపూడి, యద్దనపూడి.

• మీకు తరచుగా గుర్తొచ్చే కొటేషన్‌/ కవితా పంక్తి?

‘‘నిప్పులు చిమ్ముకుంటూ నింగికి నేనెగిరిపోతే నిబిడాశ్చర్యంతో వీరు–

నెత్తురు కక్కుకుంటూ నేలకు నే రాలిపోతే నిర్దాక్షిణ్యంగా వీరే...’’

(శ్రీశ్రీ ‘మహాప్రస్థానం’)

ఎవరైనా సక్సెస్ గురించో, నా విజయాల గురించో మాట్లాడితే

ఈ మాట ఒకసారి నా మైండ్ ‌లోకి వచ్చి వెళ్తుంది. అందుకే నేను దేనినీ తలకి ఎక్కించుకోను.

(రవి మంత్రి మొదటి నవల ‘అమ్మ డైరీలో కొన్ని పేజీలు’ 2023లో విడుదలైంది.)

-రవి మంత్రి