Tax Payment Deadline: జూన్ 2025లో పన్ను చెల్లింపుల గడువు గురించి తెలుసా..
ABN , Publish Date - May 30 , 2025 | 08:26 PM
భారతదేశ ఆర్థిక నిర్వహణలో ప్రతి నెల కూడా చాలా కీలకమని చెప్పుకోవచ్చు. ప్రతి నెలలో కూడా ఏదో ఒక చెల్లింపులు, మార్పులు జరుగుతుంటాయి. అయితే జూన్ 2025లో (Tax Payment Deadline June 2025) వచ్చే పన్ను చెల్లింపులు ఏంటి, జరగనున్న మార్పులు ఎలా ఉన్నాయనే విషయాలను ఇప్పుడు తెలుసుకుందాం.
భారతదేశంలో ప్రతి నెలలో కూడా ఆర్థిక లావాదేవీలకు సంబంధించి కొన్ని కీలకమైన చెల్లింపు గడువులు ఉంటాయి. ఈ క్రమంలో జూన్ 2025 నెలలో కూడా కొన్ని పన్ను చెల్లింపులు (Tax Payment Deadline June 2025), బ్యాంకింగ్ నియమాలు, ఆర్థిక సంస్కరణలు, ఇతర ముఖ్యమైన అంశాలు ఉన్నాయి. ఇవి సామాన్య ప్రజలు తెలుసుకోవడం ద్వారా వారి చెల్లింపులను సులభతరం చేసుకోవచ్చు. ఇవి క్రమంగా భారత ఆర్థిక వ్యవస్థపై కూడా ప్రభావం చూపిస్తాయి. అవేంటో ఇప్పుడు చూద్దాం.
ఆదాయపు పన్ను అడ్వాన్స్ టాక్స్
ఆదాయపు పన్ను చెల్లింపుదారులు, ముఖ్యంగా వ్యాపారవేత్తలు, స్వతంత్ర వృత్తిదారులు, అధిక ఆదాయం ఉన్న వ్యక్తులు 2025-26 ఆర్థిక సంవత్సరానికి సంబంధించిన మొదటి విడత అడ్వాన్స్ టాక్స్‌ను జూన్ 15, 2025 నాటికి చెల్లించాలి. ఈ విడతలో మొత్తం అంచనా పన్నులో కనీసం 15% చెల్లించాల్సి ఉంటుంది. ఈ గడువును పాటించకపోతే, వడ్డీ జరిమానాలు విధిస్తారు. దీనిని ఆదాయపు పన్ను శాఖ వెబ్‌సైట్‌(www.incometax.gov.in) ద్వారా చెల్లింపు చేసుకోవచ్చు.
TDS/TCS రిటర్న్స్ దాఖలు
వ్యాపార సంస్థలు, యజమానులు, TDS (Tax Deducted at Source) లేదా TCS (Tax Collected at Source) చెల్లించే వారు మే 2025 నెలకు సంబంధించిన రిటర్న్స్‌ను జూన్ 30, 2025 నాటికి దాఖలు చేయాలి. ఈ రిటర్న్స్‌ను సకాలంలో దాఖలు చేయడం వలన పన్ను వివరాలు సరిగ్గా నమోదవుతాయి, జరిమానాలను నివారించవచ్చు.
GST రిటర్న్స్
గూడ్స్ అండ్ సర్వీసెస్ టాక్స్ (GST) చెల్లింపుదారులు మే 2025 నెలకు సంబంధించిన GSTR-3B రిటర్న్స్‌ను జూన్ 20, 2025 నాటికి దాఖలు చేయాలి. అలాగే, GSTR-1 (అవుట్‌వర్డ్ సప్లైస్) రిటర్న్స్ జూన్ 11, 2025 నాటికి దాఖలు చేయాల్సి ఉంటుంది. చిన్న వ్యాపారులు, క్వార్టర్లీ రిటర్న్స్ ఎంచుకున్న వారు ఈ గడువులను గమనించుకోవాలి. GST పోర్టల్ (www.gst.gov.in) ద్వారా ఈ రిటర్న్స్ దాఖలు చేయవచ్చు.
బ్యాంకింగ్ నియమాలలో మార్పులు
జూన్ 2025లో బ్యాంకింగ్ రంగంలో కొన్ని ముఖ్యమైన మార్పులు అమలులోకి వచ్చే అవకాశం ఉంది. రూ.50,000 కంటే ఎక్కువ మొత్తం ఉన్న చెక్కు చెల్లింపుల కోసం ఖాతాదారులు ఎలక్ట్రానిక్‌ రూపంలో వివరాలు సమర్పించాల్సి ఉంటుంది. చెక్కు సంఖ్య, గ్రహీత వివరాలు, మొత్తం వంటి సమాచారం బ్యాంకు ధ్రువీకరణ తర్వాతే చెల్లింపు జరుగుతుంది. ఈ నియమం మోసాలను నివారించడానికి, ఆర్థిక లావాదేవీలలో పారదర్శకతను పెంచడానికి ఉద్దేశించబడింది.
యూపీఐ లావాదేవీల ప్రోత్సాహం
తక్కువ విలువైన UPI లావాదేవీలను ప్రోత్సహించడానికి కేంద్ర ప్రభుత్వం రూ.1,500 కోట్లతో ప్రోత్సాహక పథకాన్ని కొనసాగిస్తోంది. ఈ పథకం చిన్న వ్యాపారులకు అదనపు ఖర్చు లేకుండా UPI సేవలను అందుబాటులోకి తెచ్చేందుకు ఉద్దేశించబడింది.
ఇవీ చదవండి:
ప్రమాదంలో ప్రజలు.. కోల్పోనున్న హిందూ కుష్ హిమాలయాలు
నీట్ పీజీపై సుప్రీంకోర్టు కీలక నిర్ణయం..
మరిన్ని బిజినెస్, అంతర్జాతీయ వార్తల కోసం క్లిక్ చేయండి
