ITR Filing Mistakes: ఐటీఆర్ ఫైల్ చేస్తున్నారా.. ఈ తప్పులు మాత్రం చేయకండి..
ABN , Publish Date - Jul 14 , 2025 | 06:33 PM
మీరు ఆదాయపు పన్ను రిటర్న్ (ITR) దాఖలు చేస్తున్నారా. అయితే ఈ కొత్త నిబంధనల గురించి మాత్రం తెలుసుకోండి. లేదంటే ఇబ్బందులు ఎదుర్కొంటారు. ఈ క్రమంలో ఐటీఆర్ ఫైల్ చేసేటప్పుడు ఈ క్రింది విషయాలు తెలుసుకోవడం మాత్రం చాలా ముఖ్యం.
ప్రస్తుతం ఐటీఆర్ (Income Tax Return) ఫైలింగ్ క్రమంగా కఠినమవుతోంది. ఎందుకంటే ఐటీ శాఖ నిబంధనలను కఠినంగా అమలు చేస్తోంది. కాబట్టి చిన్న పొరపాట్ల వల్ల కూడా ఇబ్బందులు ఎదుర్కొనే అవకాశం ఉంది. ప్రధానంగా Section 139(9) కింద Defective Return అంటూ నోటీసులు వస్తున్నాయి. ఇలా జరిగితే మీ రిఫండ్ ఆలస్యం, జరిమానా వేయడం వంటివి జరుగుతాయి. కాబట్టి దాఖలు చేసే ముందు చిన్న చిన్న తప్పులు చేయకూడదని నిపుణులు సూచిస్తున్నారు. అవేంటో ఇప్పుడు తెలుసుకుందాం.
ఐటీఆర్-1 సాధారణ తప్పు
గతంలో మీకు ఏదైనా క్యాపిటల్ గెయిన్స్ ఉంటే ఐటీఆర్-1 ఫారమ్ ఉపయోగించడం సాధ్యం కాదు. కానీ ఇప్పుడు, కొత్త నిబంధనల ప్రకారం, మీ క్యాపిటల్ గెయిన్స్ స్టాక్స్ లేదా ఈక్విటీ మ్యూచువల్ ఫండ్స్ నుంచి వచ్చినవి లేదా రూ. 1.25 లక్షల కంటే తక్కువగా ఉంటే, మీరు ఐటీఆర్-1 ఉపయోగించవచ్చు.
ఈ మొత్తం రూ.1.25 లక్షలను మించితే లేదా మీకు క్యారీ ఫార్వర్డ్ లాసెస్ ఉంటే, ఐటీఆర్-1 ఉపయోగించడం చెల్లదు. అలా చేస్తే, మీ రిటర్న్ తప్పుగా పరిగణించబడుతుంది. ఆదాయపు పన్ను శాఖ ఈ తప్పును త్వరగా గుర్తించి, 15 రోజుల్లో సరిచేయమని నోటీసు పంపుతుంది.
నోటీసు విస్మరిస్తే ఏమవుతుంది
మీరు నోటీసుకు స్పందించకపోతే లేదా సమయానికి తప్పును సరిదిద్దకపోతే, ఆదాయపు పన్ను శాఖ మీ రిటర్న్‌ను ఫైల్ చేయనట్టుగా భావిస్తుంది. దీని వల్ల మీకు పెనాల్టీలు విధించబడవచ్చు. మీ రిఫండ్ రావడంలో చాలా ఆలస్యం జరుగుతుంది.
డిఫెక్టివ్ రిటర్న్‌ను సరిచేయడం ఎలా?
రివైజ్డ్ రిటర్న్ ఫైల్ చేయడం: మీ ఒరిజినల్ రిటర్న్ ఇంకా ప్రాసెస్ కాకపోతే, ఆదాయపు పన్ను పోర్టల్‌లో లాగిన్ అవ్వండి. రివైజ్డ్ రిటర్న్ ఆప్షన్ ఎంచుకుని, సరైన ఫారమ్‌ను సబ్మిట్ చేయండి
త్వరగా ఈ-వెరిఫై: రివైజ్డ్ రిటర్న్ ఫైల్ చేసిన తర్వాత, 30 రోజుల్లో ఆధార్ OTP, నెట్ బ్యాంకింగ్ లేదా డిజిటల్ సిగ్నేచర్ ఉపయోగించి ఈ-వెరిఫై చేయండి. ఇది చేయకపోతే మీ రిటర్న్ చెల్లదు
ప్రాసెస్ అయిన రిటర్న్‌ను సరిదిద్దండి: ఒకవేళ మీ రిటర్న్ ఇప్పటికే ప్రాసెస్ అయి ఉంటే, సెక్షన్ 154 కింద పోర్టల్‌లో రెక్టిఫికేషన్ అభ్యర్థన సబ్మిట్ చేయడం ద్వారా చిన్న తప్పులను సరిచేయవచ్చు.
డెడ్‌లైన్‌లను పాటించండి: రివైజ్డ్ లేదా రెక్టిఫైడ్ రిటర్న్‌లను అసెస్‌మెంట్ ఇయర్ (మార్చి 31, 2026, FY 2024-25 కోసం) ముగిసేలోపు లేదా ఒరిజినల్ రిటర్న్ ప్రాసెస్ అయ్యేలోపు సబ్మిట్ చేయాలి.
నోటీసులకు వెంటనే స్పందించండి: సెక్షన్ 139(9) కింద నోటీసు వస్తే, వీలైనంత త్వరగా స్పందించాలి. అవసరమైతే, ఆన్‌లైన్‌లో ఎక్స్‌టెన్షన్ కోసం అభ్యర్థించవచ్చు. మీకు విదేశీ ఆదాయం లేదా విభిన్న రకాల క్యాపిటల్ గెయిన్స్ వంటి సంక్లిష్టమైన కేసులు ఉంటే, టాక్స్ ఎక్స్‌పర్ట్ లేదా చార్టర్డ్ అకౌంటెంట్ సహాయం తీసుకోవడం మంచిది.
ఇవి కూడా చదవండి
యూట్యూబ్‌లో ఆ వీడియోలపై ఆదాయం రద్దు.. కొత్త రూల్స్
ఎయిర్ పోర్టులో 10వ తరగతితో ఉద్యోగాలు..లాస్ట్ డేట్ ఎప్పుడంటే
మరిన్ని జాతీయ, తెలుగు వార్తల కోసం క్లిక్ చేయండి
