IPL 2025 DC vs KKR: రాణించిన కేకేఆర్ బ్యాటర్లు.. ఢిల్లీ ముందు భారీ టార్గెట్

చాలా రోజుల తర్వాత కోల్‌కతా నైట్ రైడర్స్ బ్యాటర్లు తమ ప్రతాపం చూపించారు. సమష్టిగా రాణించి భారీ స్కోరు సాధించారు. బ్యాటింగ్‌కు అనుకూలిస్తున్న పిచ్‌పై బ్యాటర్లు అందరూ తమ వంతు పరుగులు చేశారు. ఢిల్లీలోని అరుణ్ జైట్లీ మైదానంలో కోల్‌కతా నైట్ రైడర్స్‌తో ఢిల్లీ క్యాపిటల్స్ జట్టు తలపడుతోంది (KKR VS DC). మొదట బ్యాటింగ్ చేసిన కోల్‌కతా నిర్ణీత 20 ఓవర్లలో 9 వికెట్లు కోల్పోయి 204 పరుగులు చేసింది. ఢిల్లీ ముందు భారీ టార్గెట్ ఉంచింది.

టాస్ గెలిచిన ఢిల్లీ క్యాపిటల్స్ కెప్టెన్ అక్షర్ పటేల్ బౌలింగ్ ఎంచుకున్నాడు. దీంతో కేకేఆర్ బ్యాటింగ్‌కు దిగింది. ఓపెనర్లు గుర్భాజ్ (26), సునీల్ నరైన్ (27) తొలి వికెట్‌కు 48 పరుగులు జోడించారు. గుర్భాజ్ అవుటైన తర్వాత వచ్చిన రహానే (26) కూడా తన వంతు పరుగులు చేశాడు. రహానే అవుట్ అయిన తర్వాత వచ్చిన వెంకటేష్ అయ్యర్ (7) ఎక్కువ సేపు క్రీజులో నిలవలేకపోయాడు. అయితే ఆ తర్వాత రఘవంశీ (44), రింకూ సింగ్ (36) కీలక భాగస్వామ్యం నెలకొల్పి కేకేఆర్ భారీ స్కోరుకు బాటలు వేశారు. చివర్లో ఆండ్రూ రస్సెల్ (17) కీలక పరుగులు చేశాడు. దీంతో కోల్‌కతా నిర్ణీత 20 ఓవర్లలో 8 వికెట్లు కోల్పోయి 204 పరుగులు చేసింది.

ఢిల్లీ బౌలర్లలో మిచెల్ స్టార్క్ మూడు వికెట్లు తీశాడు. కెప్టెన్ అక్షర్ పటేల్, విప్రాజ్ నిగమ్ రెండేసి వికెట్లు తీశారు. ఛమీరా ఒక వికెట్ దక్కించుకున్నాడు. ఈ మ్యాచ్‌లో గెలవాలంటే ఢిల్లీ క్యాపిటల్స్ 205 పరుగులు టార్గెట్ చేయాలి. ఈ మ్యాచ్‌లో కోల్‌కతా నైట్ రైడర్స్ ఓడిపోతే ఆ జట్టు ప్లే ఆఫ్స్ అవకాశాలు క్లిష్టంగా మారతాయి. ఢిల్లీ గెలిస్తే పాయింట్ల పట్టికలో రెండో స్థానానికి ఎగబాకుతుంది.

మరిన్ని క్రీడా వార్తలు కోసం క్లిక్ చేయండి..