DRDO ULPGM V3: డ్రోన్ ద్వారా మిసైల్‌ను ప్రయోగించిన డీఆర్‌డీఓ

ఇంటర్నెట్ డెస్క్: భారత రక్షణ రంగ పరిశోధన సంస్థ (డీఆర్‌డీఓ) మరో విజయాన్ని అందుకుంది. డ్రోన్ ద్వారా ప్రిసిషన్ గైడెడ్ మిసైల్‌-వీ3ని (యూఎల్‌పీజీఎమ్) విజయవంతంగా ప్రయోగించింది. కర్నూల్‌లోని నేషనల్ ఓపెన్ ఏరియా రేంజ్‌‌లో ఈ ప్రయోగాన్ని నిర్వహించారు. ఈ ప్రయోగంలో డీఆర్‌డీఓతో పాటు రక్షణ రంగానికి చెందిన పలు సంస్థలు పాల్గొన్నాయి.

పరీక్ష విజయవంతం కావడంపై రక్షణ శాఖ మంత్రి రాజ్‌‌నాథ్ సింగ్ హర్షం వ్యక్తం చేశారు. స్వదేశీ రక్షణ రంగ సామర్థ్యాల అభివృద్ధికి ఈ ప్రయోగం గొప్ప ప్రోత్సాహకమని వ్యాఖ్యానించారు.

డ్రోన్స్ ద్వారా ప్రయోగించే పలు ఆయుధాల అభివృద్ధిపై డీఆర్‌డీఓ ఇప్పటికే దృష్టి కేంద్రీకరించింది. ఇందుకు సంబంధించిన పలు అంశాలను ఎయిరో ఇండియా-2025 షోలో ప్రదర్శించింది. ఇన్‌ఫ్రారెడ్ సీకర్స్, డ్యుయెల్ థ్రస్ట్ ప్రొపల్షన్ వ్యవస్థలను ఆవిష్కరించింది. ఈ వ్యవస్థలు తాజాగా మిసైల్‌లో కూడా ఉండే అవకాశం ఉంది.

డ్రోన్స్‌తో పాటు ఇతర వేదికల నుంచి ప్రయోగించే విధంగా యూఎల్‌పీజీఎమ్‌ను డీఆర్‌డీఓ అభివృద్ధి చేస్తోంది. సుదూరాన ఉన్న లక్ష్యాలను అత్యంత కచ్చితత్వంతో ధ్వంసం చేసేలా ఈ తేలిక పాటి మిసైల్‌ను అభివృద్ధి చేస్తోంది.

ఇక కర్నూల్‌లోని ప్రయోగ వేదికలో ఆయుధ పరీక్షలకు సంబంధించి అనేక ఏర్పాట్లు అందుబాటులో ఉన్నాయి. ఇటీవల అక్కడ లేజర్ ఆధారిత ఆయుధాలను (డీఈడబ్ల్యూ) కూడా విజయవంతంగా పరీక్షించారు. ఫిక్స్‌డ్ వింగ్ యూఏవీలు, స్వార్మ్ డ్రోన్స్‌ను ధ్వంసం చేసేలా డీఈడబ్ల్యూలను అభివృద్ధి చేశారు.

శత్రుదేశ దాడులను తిప్పికొట్టడం, నిఘాతో పాటు ప్రతిదాడులు చేసేందుకు అవసరమైన అనేక డ్రోన్స్‌ను డీఆర్‌డీఓ అభివృద్ధి చేస్తోంది. దీర్ఘశ్రేణి లక్ష్యాలను కచ్చితత్వంతో ధ్వంసం చేసే తపస్, ఆర్చర్ డ్రోన్స్‌తో పాటు శత్రు దేశ నిఘాకు చిక్కని ఘాతక్, స్విఫ్ట్‌ డ్రోన్స్‌ను అభివృద్ధి చేసింది. షార్ట్ రేంజ్ నిఘా కోసం పుష్పక్, గోల్డెన్ హాక్ వంటి డ్రోన్స్‌ను కూడా డీఆర్‌డీఓ రంగంలోకి దించింది. ఈ ప్రయత్నాల్లో డీఆర్‌డీఓతో పాటు పలు ప్రైవేటు రక్షణ రంగ సంస్థలు, స్టార్టప్‌లు పాలుపంచుకుంటున్నాయి.

ఇవి కూడా చదవండి:

మాజీ ఉపరాష్ట్రపతికి టైప్ 8 బంగళా కేటాయించిన కేంద్రం.. అసలు ఇదేంటంటే..

మాజీ ఉపరాష్ట్రపతి జగదీప్ ధన్‌ఖడ్‌కు పెన్షన్ ఎంత వస్తుందో తెలుసా

మరిన్ని జాతీయ, అంతర్జాతీయ వార్తల కోసం క్లిక్ చేయండి