Skincare Tips: కళ్లద్దాల మచ్చలా..
ABN , Publish Date - Jul 12 , 2025 | 12:06 AM
ఈరోజుల్లో పెద్దలే కాదు చిన్నపిల్లలూ కళ్లద్దాలు పెట్టుకోవాల్సి వస్తోంది.
ఈరోజుల్లో పెద్దలే కాదు చిన్నపిల్లలూ కళ్లద్దాలు పెట్టుకోవాల్సి వస్తోంది. ఫ్యాషన్‌ కోసం కూడా కొందరు కళ్లజోడు వాడతారు. అయితే కళ్లజోడు వలన ముక్కు మీద మచ్చలు ఏర్పడుతుంటాయి. వాటిని ఎలా తగ్గించుకోవాలో తెలుసుకుందాం...
కలబందలో చర్మాన్ని ప్రకాశవంతంగా మార్చే లక్షణాలు ఉన్నాయి. రాత్రి పడుకొనేముందు కలబంద గుజ్జును కళ్లజోడు వలన కలిగిన మచ్చల మీద రాయాలి. తెల్లారి లేవగానే నీళ్లతో కడిగేయాలి.
బంగాళదుంప రసాన్ని మచ్చల మీద రాసి పావుగంట తరువాత కడిగేయాలి. రోజకు రెండుసార్లు ఇలా చేస్తే మంచి ఫలితం ఉంటుంది.
ముఖం మీద మచ్చలను తొలగించడంలో కీరదోశ చక్కగా పని చేస్తుంది. కీరదోసను గుండ్రటి ముక్కలుగా కోసి, ముక్కు మీద మచ్చలున్న చోట పెట్టి కొంచెం సేపు రుద్దాలి. తరువాత చల్లటి నీటితో కడిగేసుకోవాలి.
తేనె చర్మానికి తేమను అందించడంతో పాటు మచ్చలను తగ్గించేందుకు బాగా సహాయపడుతుంది. ఒక స్పూన్‌ తేనెలో ఒక స్పూన్‌ పాలు కలిపి మచ్చల మీద రాసి 15 నిమిషాల తరువాత కడిగేయాలి.
నారింజ తొక్కను బాగా ఎండబెట్టి మిక్సీలో వేసి పొడి చేసుకోవాలి. ఈ పొడిలో కొంచెం పాలు పోసి పేస్టులా చేసుకుని మచ్చల మీద రాసి పావుగంట తరువాత చన్నీటితో కడిగేయాలి.
గులాబీ నీళ్లను మచ్చల మీద రాసి రాత్రంతా ఉంచి ఉదయాన్నే కడిగేయాలి. రోజూ ఇలా చేసిన మంచి ఫలితముంటుంది.
