Natural Remedy: నరాల జబ్బులకు దివ్యౌషధం

ప్రకృతిలో ఉన్న ప్రతి మొక్కకు ఏదో ఒక ప్రయోజనం ఉంటుంది. కొన్ని మొక్కలు పిచ్చిగా కనిపిస్తాయి. కానీ వాటి వల్ల కూడా అనేక ప్రయోజనాలుంటాయి. అలాంటి వాటిలో ఒకటి ‘ఎలుక చెవి ఆకు’ మొక్క. ఈ మొక్క ఆకులు ఎలుక చెవి ఆకారంలో ఉంటాయి. అందువల్ల ఈ మొక్కను సంస్కృతంలో ఖుకర్ణి, మూషిక కర్ణి అని కూడా పిలుస్తూ ఉంటారు. భోజనకుతూహలం గ్రంథం ప్రకారం దీని ఆకులు కారం తీపి రుచులు కలిసి ఉంటాయి. ఇవి కఫాన్ని, పైత్యాన్ని తగ్గిస్తాయి. ఈ ఆకుల వల్ల కలిగే ఇతర ప్రయోజనాలను కూడా ఈ గ్రంథంలో పేర్కొన్నారు.

• ఈ ఆకులు శరీరంలోపల ఉండే వాపులను తగ్గిస్తాయి. తలనెప్పి నుంచి ఉపశమనాన్ని ఇస్తాయి. కడుపులో నులిపురుగులకు ఇది మంచి విరుగుడు. నులిపురుగులు పోతే జీర్ణశక్తి బాగుపడుతుంది.

• కొన్ని అటవీ ప్రాంతాల్లో ఈ ఆకులను పాము విషానికి విరుగుడుగా కూడా వాడతారు. పేగుల్లో పెరిగే ఎలికపాములకు విరుగుడుగా ఈ ఆకులను వినియోగిస్తారు.

• ఫిట్స్‌ వంటి నరాల జబ్బులకు ఈ ఆకులు మంచి మందు. రకరకాల మానసిక వ్యాధులకు విరుగుడుగా వీటిని వాడతారు.

• మధుమేహ నియంత్రణకు ఈ ఆకుల కషాయం మంచి మందు. ప్రతి రోజు ఈ ఆకుల కషాయం తాగితే మధుమేహం అదుపులో ఉంటుంది.

• చెవి సమస్యల పరిష్కారానికి ఈ ఆకులు బాగా పనిచేస్తాయి. ఈ ఆకులను దంచి.. దాని నుంచి రసం తీసి.. ఆ రసంతో సరిసమానంగా నువ్వుల నూనె కలిపి.. కొద్దిగా వేడి చేసి చెవిలో వేసుకుంటే.. చెవిలో వచ్చే రకరకాల ఇన్‌ఫెక్షన్లు తగ్గుతాయి.

• ఊపిరితిత్తుల ఇన్‌ఫెక్షన్‌లు తరచుగా వచ్చేవారికి ఈ ఆకులు బాగా పనిచేస్తాయి. ఉబ్బసం, ఆయాసం వంటి వాటికి ఈ ఆకుల కషాయం విరుగుడుగా పనిచేస్తుంది.

-గంగరాజు అరుణాదేవి