Migration Of Dreams: వలస పక్షులు

రెండు జల్లుల తెరిపిలో

బట్టలారేసుకున్నట్టు

కాలం తీగెలపై బతుకులు ఆరేసుకోవాలి

కన్నీటిలోనూ

రంగులు వెతుక్కునే

ఆశలు మనవి

ఎన్ని తెరచాపలు కట్టినా

చెమట సంద్రంలోని

ఆకలి నావ నడక

కుదుటపడదు

కంటి నుండి కంటికి

కన్నీటిని రాజేసే

తడి నిప్పు ఆరదు

సాలెగూడులో చిక్కిన

పురుగుల్లా

గడియారంలోని

ముళ్ళు పెట్టే మూల్గులకు

చీకటి కిటికీ

రెప్పలు చాచగానే

తూరుపు బండి

వేకువ కూత పెడుతుంది

ఇంకో కొత్త రోజుకి

రెక్కలివ్వడానికి

నిద్రకన్ను గుడ్డిలాంతరులా

తెరుచుకుంటుంది

ఆకుల్లేని కొమ్మల్లో

వసంతాన్ని వెదుక్కుంటూ

విరిగిన బతుకుతెరువుకి

ఊతకర్రలు కట్టి

ఆకలి కడుపు దాకా

మెతుకులను ఎగదోస్తున్నా

మన కలలన్నీ వలసపక్షులే

కన్ను చూపే నిజమేమో

ఓ ఎండిన సరస్సు.

-మిరప మహేష్